Ўзбекистонда реновация ҳисобига қуриладиган уйлар улушини 15 фоиздан 60 фоизга етказиш режалаштирилмоқда — президент
Президент форум юқори даражада ташкил этилгани учун Озарбайжон президенти Илҳом Алиевга миннатдорлик билдирди. Шунингдек, Қорабоғда олиб борилаётган тикланиш ва бунёдкорлик ишларини эътироф этиб, Ўзбекистон бу жараёнларга ҳисса қўшишга тайёрлигини қайд этди.
Давлат раҳбари «Барча учун уй-жой: хавфсиз ва барқарор шаҳарлар ҳамда ҳамжамиятлар» мавзуси бугун ҳар қачонгидан долзарб аҳамият касб этаётганини айтди. Унга кўра, XXI аср ўрталарига бориб дунё аҳолисининг қарийб 70 фоизи шаҳарларда яшайди.
Шавкат Мирзиёев дунёда қарийб 3 миллиард инсон бирламчи яшаш шароитларидан маҳрум эканини, бир миллиарддан ортиқ одам норасмий турар жойлар ва харобаларда яшашини, 300 миллиондан зиёд аҳоли эса умуман бошпанасиз эканини таъкидлади. У иқлим ўзгариши, халқаро инқирозлар ва миграция жараёнлари шаҳарлар олдига янги муаммоларни қўяётганини билдирди.
Президент урбанизация Янги Ўзбекистон учун ҳам стратегик аҳамиятга эга эканини қайд этди. Кейинги 15 йил ичида мамлакат аҳолиси 38 миллиондан 50 миллион нафарга, урбанизация даражаси эса 51 фоиздан 65 фоизга етиши кутилмоқда.
Унинг айтишича, сўнгги ўн йилда Ўзбекистонда қурилаётган уй-жойлар сони 10 баробар ошиб, 2025 йилда 238 минг хонадонга етган. 2030 йилгача бу кўрсаткични яна 1,5 баробар ошириш режалаштирилган. Арзон уй-жой дастурларига ҳар йили бюджетдан қарийб 2 миллиард доллар ажратилмоқда.
Шунингдек, 2024 йилда норасмий турар жойлар муаммосини ҳал қилиш бўйича алоҳида қонун қабул қилиниб, 100 мингга яқин уй-жойга ҳужжат расмийлаштириб берилгани айтилди. Реновация ҳисобига қуриладиган уйлар улушини эса 15 фоиздан 60 фоизга етказиш режалаштирилган.
Президент Урбанизация миллий қўмитаси ташкил этилганини, «Яшил макон» ва «Тоза ҳаво» дастурлари доирасида шаҳарларда яшил ҳудудлар улушини 2030 йилгача 30 фоизга етказиш мақсад қилинганини билдирди.
Шавкат Мирзиёев икки миллион аҳолига мўлжалланган «Янги Тошкент» мегалойиҳасига ҳам тўхталиб, унда «яшил», «ақлли», «хавфсиз» ва «15 дақиқали шаҳар» тамойиллари жорий этилганини айтди. Унинг маълум қилишича, лойиҳанинг биринчи босқичидаёқ қиймати 25 миллиард доллардан ортиқ инвестиция лойиҳалари бошланган.
Президент бундай массивлар нафақат пойтахтда, балки мамлакатнинг барча ҳудудларида «Янги Ўзбекистон» массивлари номи билан барпо этилаётганини қайд этди. Ҳозиргача 61 та шундай массив қурилган бўлса, 2030 йилгача уларнинг сони 100 тага етказилиши режалаштирилган.
Шунингдек, давлат раҳбари БМТнинг Аҳоли пунктлари бўйича дастури ижрочи директори Anacláudia Rossbach, шунингдек, World Bank ва Asian Development Bankга урбанизация соҳасидаги ҳамкорлик учун миннатдорлик билдирди.
Ўзбекистон президенти муҳокама қилинаётган масалалар юзасидан бир қатор таклиф ва ташаббусларни илгари сурди.
«Мутаносиб урбанизация» тамойилини кенг жорий этиш. «Барча ҳудудларда аҳоли учун тенг яшаш шароитларини яратиш кичик ва ўрта шаҳарларни уйғун ривожлантиришни талаб қилмоқда. Шу сабабли ҳамкор давлатларни шаҳарларни ривожлантиришда „мутаносиб урбанизация“ тамойилини кенг жорий этишга чақираман», — деди президент.
Ақлли ва хавфсиз шаҳарлар альянси. Мирзиёев шаҳар бошқарувида сунъий интеллект ва рақамли трансформация имкониятларидан барча давлатлар тенг фойдалана олиши зарур эканини қайд этди. «Ушбу соҳада технология, стандартлар ва тажрибаларни тизимли алмашишга қаратилган халқаро Ақлли ва хавфсиз шаҳарлар альянсини тузишни таклиф қиламан», — деди давлат раҳбари.
Самарқанд шаҳрида халқаро форум. Давлат раҳбари ёшлар ва аҳолининг эҳтиёжманд қатламларини сифатли ҳамда арзон уй-жойлар билан таъминлаш жуда муҳимлигини қайд этди. «Шу мақсадда келгуси йилда Самарқанд шаҳрида уй-жой қурилишига молия ва инвестицияларни жалб этишдаги янгича ёндашувлар юзасидан халқаро форум ўтказишга тайёрмиз», — деди Шавкат Мирзиёев.
«Яшил шаҳар» халқаро мукофоти. Президент глобал иқлим ўзгаришларини инобатга олган ҳолда «яшил шаҳарлар»ни барпо этишнинг умумий тамойиллари ва стандартларини қабул қилиш долзарб аҳамият касб этаётганини таъкидлади. У шаҳарларнинг табиат билан уйғун ривожланишини рағбатлантириш мақсадида БМТ-Ҳабитатнинг «Яшил шаҳар» халқаро мукофотини таъсис этишни таклиф қилди.
Форумининг 15-сессиясини Янги Тошкент шаҳрида ўтказиш. «Урбанизация даражасининг ўсиши шаҳарлардаги ўзини ўзи бошқаришнинг анъанавий тузилмалари ролини янада оширмоқда. Шу муносабат билан Бутунжаҳон урбанизация форумининг 15-сессиясини 2030 йилда Янги Тошкент шаҳрида ўтказишни ва унинг бош мавзусини „Шаҳарларнинг барқарор ривожланишида маҳалла институтининг ўрни“ деб номлашни таклиф этаман», — деди Шавкат Мирзиёев.
Ўзбекистон раҳбари нутқи сўнгида ушбу тадбир ўзаро манфаатли ва истиқболли масалалар юзасидан биргаликда ечимлар топишга, янги ташаббусларга йўл очиш ва соҳа ривожига салмоқли ҳисса қўшишига ишонишини айтди ва форум ишига муваффақиятлар тилади.