Ҳиндистон бош вазири Ўзбекистонга келди. Уни аэропортда президент кутиб олди

Ҳиндистон бош вазири Нарендра Моди шанба куни давлат ташрифи билан Ўзбекистонга келди. «Тошкент-Ҳумо» аэропортида уни президент Шавкат Мирзиёев кутиб олди.

Ташрифнинг асосий тадбирлари 30 август, якшанба кунига белгиланган. Музокаралар якунида икки томонлама битимлар тўплами имзоланиши кўзда тутилган.

Томонлар савдо ва инвестициялар, мудофаа, рақамли боғлиқлик, энергетика, таълим ҳамда гуманитар алоқалар соҳаларидаги ҳамкорлик масалаларини муҳокама қилиши кутилмоқда.

Шавкат Мирзиёев ва Нарендра Моди, шунингдек, «Ривожланган Ҳиндистон — 2047» (Viksit Bharat 2047) концепцияси ва «Ўзбекистон — 2030» стратегиясида назарда тутилган умумий ривожланиш мақсадларини илгари суриш бўйича ҳам фикр алмашади.

Нарендра Моди Тошкент марказидаги Шастри ҳайкали ҳамда Тошкент давлат шарқшунослик университети ҳузуридаги Маҳатма Ганди марказига ташриф буюради.

Ҳиндистон ТИВ аввалроқ бу Нарендра Модининг Ўзбекистонга тўртинчи ташрифи эканини маълум қилганди.

Етакчилар учрашуви арафасида Gazeta икки мамлакат муносабатлари қандай ривожлангани ва ҳозирда ҳамкорликнинг қайси йўналишлари олдинги ўринларга чиқаётганини ўрганган.