US Open. Афсонавий опа-сингил жуфтлик илк босқичдаёқ мусобақани тарк этди

АҚШнинг Нью Йорк шаҳрида йилнинг энг сўнгги “Катта дубулға” турнири — АҚШ очиқ чемпионати давом этмоқда. Серена ва Винус Уилямс US Open турнирининг аёллар жуфтлик баҳсларида узоқ танаффусдан сўнг яна бирга кортга чиқди. Бироқ афсонавий опа-сингиллар илк учрашувдаёқ мағлубиятга учради.

Улар мусобақанинг биринчи даврасида тайванлик Чан Ҳао-Чинг ва австралиялик Мая Жоинт жуфтлигига қарши баҳс олиб борди. Қарийб уч соат давом этган муросасиз учрашувда Уилямслар жамоаси 3:6, 7:6, 6:7 ҳисобида имкониятни бой берди.

Серена ва Винус ҳал қилувчи сетда 1:4 ҳисобида ортда бораётган бўлса-да, ҳисобни тенглаштиришга муваффақ бўлди. Тай-брекда эса опа-сингиллар 5:0 ҳисобида олдинга чиқиб олган эди. Шунга қарамай, улар устунликни сақлаб қола олмади ва баҳсни мағлубият билан якунлади.

Опа-сингил Уилямслар US Openдаги жуфтлик баҳсларида 2022-йилдан бери илк марта бирга кортга чиқди. Улар аввалроқ ушбу турнирнинг аёллар жуфтлик баҳсларида икки марта — 1999 ва 2009-йилларда — чемпион бўлган.

Мағлубиятга қарамай, Серена ва Винус Уилямснинг кортга қайтиши US Open томошабинларининг олқишига сабаб бўлди. Опа-сингиллар 14 марта “Катта дубулға” турнирларининг жуфтлик баҳсларида ғолиб чиққан.

Манба: www.daryo.uz