Қибрай туманидаги «Aksa Toshkent» ИЭСнинг очиқ тақсимлаш қурилмасига ҳаво шари тушиб кетиши ҳимоя тизимининг ишга тушишига ва электр таъминотида узилишлар юзага келишига олиб келди. Бу ҳақда энергетика компанияси хабар берди.

Ҳодиса 19 октябрь куни соат 19:05 да содир бўлган. Мавжуд маълумотларга кўра, станция қуввати 460 МВтдан 185 МВтгача пасайган. Электр узилишлари пойтахтнинг Юнусобод, Олмазор, Мирзо Улуғбек ва Шайхонтоҳур туманларига таъсир кўрсатди.

Компанияда аҳолини электр станциялари, подстанциялар ва бошқа электр қурилмалари яқинида ҳаво шарларини учирмасликка чақиришди, чунки бу электр таъминотида узилишларга олиб келиши мумкин.