Расман. Баҳодир Жалолов ноябрь ойида жанг ўтказади

Икки карра Олимпия чемпиони Баҳодир Жалоловнинг навбатдаги жанг санаси эълон қилинди. У 14 ноябрь куни Тошкентдаги “Humo Arena” мажмуасида Lift Promotions томонидан ташкил этиладиган бокс оқшомида рингга кўтарилади. Ҳозирча унинг рақиби ким бўлиши борасида расмий маълумот берилмаган.

Шунингдек, ушбу кечада Шаҳрам Ғиёсов, Лазизбек Муллажонов, Аълохон Абдуллаев, Озодбек Алиев ва Суҳроб Қаюмов каби ўзбекистонлик боксчилар рингга чиқиши кутилмоқда. Оқшомнинг асосий жангида Лазизбек Муллажонов иштирок этиши режалаштирилган. Ташкилотчилар маълумотига кўра, Лазизбек WBC камари учун жанг қилади.

Эслатиб ўтамиз, Баҳодир Жалолов сўнгги жангини 6 октябрь куни Россиянинг Санкт-Петербург шаҳрида бўлиб ўтган “IBA Про 10” турнирида маҳаллий Виталий Кудуховга қарши ўтказиб, ҳакамлар қарорига кўра ғалаба қозонганди.

Маълумот учун, Баҳодир Жалолов шу кунга қадар профессионал боксда 16 марта жанг ўтказиб, уларнинг 14 тасида муддатидан аввал ғалаба қозонган бўлса, 2 баҳсда очколар ҳисобига рақибдан устун келган.

Манба: daryo.uz