Нукуслик талаба қизга президент совғаси сифатида Volkswagen электромобили топширилди

Ўзбекистон президенти Шавкат Мирзиёев Нукус давлат техника университетининг 2-босқич талабаси Айзада Асановага Volkswagen электромобилини совға қилиш бўйича топшириқ берди, деб хабар бермоқда Ўзбекистон Олий таълим, фан ва инновациялар вазирлиги.

Бу ҳақда 30 июнь куни Ёшлар куни муносабати билан Олимпия шаҳарчасида президентнинг ёшлар билан учрашуви доирасида маълум қилинди.

Айзада Асанова «Келажак муҳандислари» халқаро фестивалида «Янги авлод автомобиллари» йўналишида ғолиб бўлган. Шунингдек, у Бельгияда бўлиб ўтадиган халқаро танловга йўлланмани ҳам қўлга киритган.

Талабанинг айтишича, лойиҳа устида 10 кишидан иборат жамоа, жумладан, етти нафар қиз ишлаган.

«Сизнинг ёш муҳандис қизларингиз Нукус эркин иқтисодий зонасида узоқ масофага энг кам энергия сарфлайдиган электромобилни ишлаб чиқди. Электромобилимиз „Янги авлод автомобили“ халқаро танловида 10 километр масофага энг кам, 40 ватт энергия сарфлаб, ғолибликни қўлга киритган», — деди Айзада «Ўзбекистон 24» телеканали эфирида.

Унинг таъкидлашича, қизлар энди нафақат таълим, тиббиёт ва спортда, балки муҳандислик соҳасида ҳам халқаро майдонга чиқмоқда.

«Ҳурматли президент, Бельгияга бориб, Ўзбекистон байроғини юқориларга кўтариб келишга ваъда берамиз», — деди талаба.

Шундан сўнг Шавкат Мирзиёев «Ўзавтосаноат» бошқаруви раиси Улуғбек Рўзиқуловга унга Volkswagen автомобилини совға қилишни топширди.

«Ҳозир топшириқ беринг Рўзиқуловга. Кечаги менга тақдимот қилган Volkswagen’нинг энг чиройли, менга ёққани бор-ку, шуни президент номидан совға қилинг», — деди давлат раҳбари.

Олий таълим, фан ва инновациялар вазирлиги Асанованинг Volkswagen Lavida XR автомобили билан тушган суратини эълон қилди. Айрим бозорларда мазкур модель Virtus номи билан сотилади. Автомобиль капотида Ўзбекистон байроғи ва давлат герби, шунингдек, «Prezident sovg‘asi» ёзуви туширилган стикер жойлаштирилган.

Айзада Асанованинг айтишича, бу совға у учун кутилмаган бўлган.

Айзада Асанова / Фото: Олий таълим, фан ва инновациялар вазирлиги

«Ҳурматли президентимиз менга автомобиль совға қилдилар. Ҳозир жуда ҳам хурсандман. Бунақа бўлишини ҳеч кутмаган эдим. Ҳурматли президентимизга каттакон раҳматлар айтаман. Биз албатта, жамоамиз билан билдирилган ишончни оқлаймиз», — деди у.

Март ойида президент топшириғига кўра Зулфия номидаги Давлат мукофоти совриндори Латофат Амировага квартира совға қилинган эди. Февраль ойида эса давлат раҳбари билан ёшлар учрашувида қўшиқ куйлаган 4-синф ўқувчисига автомобиль топширилганди.