АҚШ давлат котиби Марко Рубио Самарқандга келди
Аэропортда уни Ўзбекистон Президенти администрацияси раҳбари Саида Мирзиёева, ташқи ишлар вазири Бахтиёр Саидов, АҚШ президентининг Жанубий ва Марказий Осиё бўйича махсус вакили Сержио Гор, АҚШ элчиси Жонатан Ҳеник ҳамда Самарқанд вилояти раҳбарияти кутиб олди.
«АҚШ давлат котиби Марко Рубиони кўҳна ва навқирон Самарқанд заминида қутлашдан мамнунман», — деб ёзди Саида Мирзиёева ўзининг Telegram каналида.
Душанба куни у ерда АҚШ-Ўзбекистон Ишбилармонлик ва инвестиция кенгашининг иккинчи йиғилиши (ҳамраислар — Саида Мирзиёева ва Сержио Гор) ҳамда минтақа давлатлари ва АҚШ ташқи ишлар вазирларининг C5+1 шаклидаги учрашуви бўлиб ўтади.
Бундан ташқари, Марко Рубио ва Бахтиёр Саидов икки мамлакат ўртасидаги Кенгайтирилган стратегик шериклик мулоқотининг илк раундини ўтказади.
«Эртанги мулоқот стратегик шерикликни янги амалий ташаббуслар билан бойитиш, шунингдек, Марказий Осиё ва АҚШ ўртасидаги ҳамкорликнинг устувор йўналишларини биргаликда белгилаб олиш учун яхши имконият бўлишига ишонамиз», — дея таъкидлади Бахтиёр Саидов.
Марко Рубио билан бирга Ўзбекистонга АҚШнинг 200 дан ортиқ йирик компаниялари вакиллари ҳам келмоқда.
Самарқандга президент Шавкат Мирзиёев ҳам етиб келди. У Ишбилармонлик ва инвестиция кенгаши йиғилишида иштирок этади ҳамда Марко Рубио билан музокаралар ўтказади.