Истанбулда тўйхонадаги жанжал вақтида Туркманистон фуқароси ҳалок бўлди

Оммавий ахборот воситалари ва ижтимоий тармоқларда Истанбулдаги тўйхонада юз берган жанжал оқибатида Ўзбекистон фуқароси ҳалок бўлгани ҳақида хабарлар тарқалди. Бироқ Ўзбекистоннинг Истанбулдаги Бош консулхонаси маълум қилишича, ҳалок бўлган шахс Туркманистон фуқароси бўлиб чиққан.

Дипломатик ваколатхона маълумотига кўра, ҳодиса Кучукчекмедже туманида содир бўлган. Ҳалок бўлган Қилич Буриев 33 ёшда бўлган.

Бош консулхона оммавий ахборот воситалари ва ижтимоий тармоқ фойдаланувчиларидан ҳодиса ҳақида хабар тарқатишда ушбу маълумотни инобатга олишни сўради.

Ҳалок бўлган шахснинг оила аъзолари ва яқинларига ҳамдардлик билдирилди.