Шахмат. Бугун блиц бўйича жаҳон чемпионати бошланади

17 ёшли Нодирбек Абдусатторов кеча, жаҳон шахмат оммаси учун кутилмаганда, рапид йўналишида жаҳон чемпионлигини қўлга киритди. Польшада ўтказилаётган турнирда бугун янада тезроқ йўналиш — блиц бўйича ЖЧ бошланади.

Ушбу турнир 21та партиядан иборат бўлади ва швейцарча тизимда ўтказилади. Бугун 12та, эртага эса 9та партия ўтказилади. Ҳар ярим соатда биттадан ўйин ўйналади.

Битта ўйин учун ҳар бир спортчига умумий 3 дақиқа вақт ва битта юриш учун қўшимча 2 сония вақт берилади. Баҳслар мана шундай тезкорлик билан ўтказилади.

Бугунги ўйинлар Тошкент вақти билан 19:00, эртанги баҳслар эса 20:00да бошланади. Эртанги баҳслар якунланганидан сўнг ғолиб ва совриндорларни тақдирлаш маросими ўтказилади.

Блицда иштирок этадиган ўзбекистонлик шахматчилар — Нодирбек Абдусатторов, Жавоҳир Синдаров ва Жаҳонгир Воҳидовга омад тилаймиз.

Манба: stadion.uz