Ўзбекистонда валюта операцияларига қўйилган янги чекловлар бекор қилинди

Жамият қабул қилмаган қарор нотўғри қарор — Мамаризо Нурмуратов.

Аввалроқ, маҳаллий нашрлар томонидан Марказий банк тижорат банклари учун валюта операцияларига қўйиладиган талабларни кучайтираётгани, бу бўйича қарор регулятор раҳбарияти томонидан қабул қилингани ҳақида хабарлар тарқатилди.

Хабарларда айтилишича, қарор билан хўжалик юритувчи субъектларнинг хорижий валютани харид қилиш ва валюта операциялари билан боғлиқ операциялари фақатгина уларнинг асосий ҳисобварағи очилган банклар томонидан амалга оширилиши талаб этилади.

Мазур хабар ижтимоий тармоқда кенг муҳокамаларга сабаб бўлганидан сўнг Марказий банк томонидан бугун, 16 сентябрь куни матбуот анжумани ташикил этилди. Анжуманда қатнашган UzNews.uz мухбирининг хабар беришича, Марказий банк томонидан мазкур қарор бугун эрталаб бекор қилинган. Тижорат банкларига тегишли хатлар юборилган.

«Кеча, Марказий банк томонидан қабул қилинган қарор муҳокамаларга сабаб бўлди. Бу қарор бўйича биз маълум бир ижобий қарашларни кўрмадик. Шу сабабли бир нарсани айтиш керак, фалсафада бир шундай тушунча бор: жамият қабул қилмаган қарор — нотўғри қарор. Шу тамойилдан келиб чиқиб, бугун эрталаб Қўмитамиз ушбу қарорни бекор қилди», — дейди Мамаризо Нурмуратов.