Шанхайдан Франкфуртга учаётган самолёт йўловчилар жанжал кўтаргани сабаб Тошкентга қўнди

Uzbekistan Airports ҳодиса юзасидан маълумот берди.

Uzbekistan Airports хабарига кўра, Германиянинг Lufthansa авиакомпаниясининг Шанхайдан Франкфуртга учаётган LH729 йўловчи рейси икки йўловчининг жанжали туфайли Тошкент халқаро аэропортидаги муқобил аэродромга келиб қўнди.

Экипаж самолёт олдига ҳуқуқ-тартибот органлари ходимларини чақиришни сўраган.

Бортида 206 нафар йўловчи бўлган Boeing 747-800 маҳаллий вақт билан 17:32 да фавқулодда қўнишни амалга оширди. Жанжал кўтарган йўловчилар рейсдан олиб ташланди.

Ҳаво кемаси Тошкентдан белгиланган аэропортга соат 20:36 да учиб кетди.