Шавкат Мирзиёев Украинадаги вазият тез фурсатда тартибга солинишига умид билдирмоқда
Унда халқаро ва икки томонлама кун тартибининг долзарб жиҳатлари муҳокама қилингани қайд этилди.
Жумладан, Россия президенти ҳамкасбига 15 август куни Алясканинг Анкориж шаҳрида ўтган Россия-АҚШ саммитининг асосий натижалари тўғрисида маълумот берган.
«Давлатимиз раҳбари эришилган келишувларни қўллаб-қувватлаб, Украина атрофидаги вазият тез фурсатда тартибга солинишига умид билдирди», — дейилади хабарда.
15 август куни Аляскада Трамп ва Путиннинг музокаралари бўлиб ўтди. Бу уларнинг Украинага кенг кўламли босқин бошланганидан кейинги биринчи шахсий учрашуви эди. Иккаласи ҳам учрашувни фойдали ва самарали деб атади, аммо аниқ натижалар ҳақида эълон қилмади. «Биз келиша олмаган бир нечта муҳим пунктлар бор. Ҳозирча келишув йўқ», — деди АҚШ президенти.
Украина президенти Владимир Зеленский 18 август куни Оқ уйда АҚШ президенти Дональд Трамп билан унинг таклифига биноан учрашади. Ушбу учрашувга Германия, Буюк Британия, Франция, Италия ва Финляндия етакчилари, Еврокомиссия раҳбари ва НАТО бош котиби ҳам боради.
Ўзбекистон президенти 16 май куни Истанбулда 2022 йилдан бери илк бор Россия ва Украина ўртасида тўғридан-тўғри музокаралар бўлиб ўтганини олқишлаганди. Ўшанда у Ўзбекистоннинг ҳарбий можаро бўйича позициясини яна бир бор таъкидлаган: Украина атрофидаги вазият «фақат дипломатик йўл билан ҳал қилиниши керак».