Индира Холдарова Республика «Келажак» маркази директори этиб тайинланди
Индира Холдарова бунга қадар ММТВ Мактабдан ташқари таълимни ташкил этиш бошқармаси бошлиғи вазифасида ишлаб келаётганди.
У турли йилларда «Камолот» ёшлар ижтимоий ҳаракати бошланғич ташкилоти ўқитувчиси, ташкилотнинг Тошкент шаҳри кенгаши аппарати ва Ёшлар иттифоқида турли лавозимларда ишлаган.
Холдарова 2020−2022 йилларда Ёшлар иттифоқи Марказий кенгаш раиси ўринбосари — «Камалак» болалар ташкилоти раиси, 2022−2023 йилларда Ёшлар ишлари агентлиги бошқарма бошлиғи лавозимларида фаолият юритган.
«Келажак» маркази президентнинг 8 сентябрдаги қарори билан Республика ўқувчи-ёшлар маркази негизида ташкил этилди.
Шавкат Мирзиеёв 8 сентябрь куни ўтказган мактабгача ва мактаб таълими соҳаси бўйича йиғилишида бундай марказлар мактаблар билан узвий ва мақсадли тадбирларни жонлантириб, муҳандислик, илм-фан, маданият, санъат, китобхонлик, спорт ва экология йўналишлари бўйича ўқувчиларни тўгаракларга жалб қилиши кераклигини айтганди.
Қарор билан «Келажак» марказининг умумий ўрта таълим ташкилотларида вертикал тизимини жорий этиш мақсадида ўқувчилар ташаббусларини қўллаб-қувватлаш бўйича мактаб маслаҳатчиси лавозими жорий этилади. Марказ шартнома асосида малакали мутахассислар ҳамда нодавлат ўқув марказларини жалб этган ҳолда тўгараклар ташкил этади.