Шавкат Мирзиёев 20−24 сентябрь кунлари Нью Йоркда бўлади

Ўзбекистон президенти Шавкат Мирзиёев БМТ Бош ассамблеясининг 80-юбилей сессияси тадбирларида иштирок этиш учун 20−24 сентябрь кунлари амалий ташриф билан Нью Йорк шаҳрида бўлади. Бу ҳақда давлат раҳбари матбуот хизмати хабар берди.

Ўзбекистон етакчиси БМТ Бош ассамблеяси ялпи сессияси умумий мунозараларининг биринчи кунида нутқ сўзлаши кутилмоқда.

Таъкидланишича, БАнинг бу йилги сессиясида глобал хавфсизлик ва барқарорликни таъминлаш, Барқарор ривожланиш мақсадларига эришиш, БМТ тизими ва халқаро молия архитектурасини ислоҳ қилиш, иқлим ўзгариши оқибатлари ва бошқа замонавий хатарларга қарши курашишнинг долзарб масалалари кўриб чиқилади.

Саммит доирасида Шавкат Мирзиёев БМТ бош котиби Антониу Гутерриш, хорижий давлатлар ва ҳукуматлар, нуфузли халқаро молиявий институтлар раҳбарлари билан музокаралар ўтказади.

Ташриф дастурининг ишбилармонлик қисмидан АҚШнинг етакчи компаниялари ва молиявий-инвестиция тузилмалари иштирокида учрашув ва тадбирлар ўрин олган. Янги келишув ва шартномалар тўплами имзоланиши кутилмоқда