Азимжон Ҳусанов Касбий таълим агентлиги раҳбари этиб тайинланди

Азимжон Нозимжонович Ҳусанов Олий таълим, фан ва инновациялар вазирлиги ҳузуридаги Касбий таълим агентлиги директори этиб тайинланди, деб хабар қилди Олий таълим, фан ва инновациялар вазирлиги.

Бунгача у Вазирлар Маҳкамаси ҳузуридаги Миграция агентлиги директори ўринбосари лавозимида ишлаган.

Азимжон Ҳусанов (1987 йилда туғилган) Тошкент давлат иқтисодиёт университетининг «Халқаро бизнес», Тошкент молия институтининг «Менежмент» йўналишини тамомлаган.

Йиллар давомида у «Камолот» ижтимоий ҳаракати туман бўлимида мутахассис бўлиб ишлаган, «Зиёкор» марказига раҳбарлик қилган, RIKS Education хусусий чет тилларини ўқитиш марказига асос солган ва раҳбарлик қилган. 2021−2023 йилларда Вазирлар Маҳкамаси ҳузуридаги Хорижий тилларни ўрганишни оммалаштириш агентлиги директори ўринбосари лавозимида ишлаган.

Ҳусанов Австралия, АҚШ, Канада, Буюк Британия ва Европадаги халқаро таълим дастурларида иштирок этган. Ўзбек, рус, инглиз ва немис тилларини билади.

Касбий таълим агентлигини ташкил этиш ташаббуси 8 сентябрь куни президент билан учрашувда билдирилганди. Дастлаб агентлик Вазирлар Маҳкамаси қошида бўлиши кутилган эди. Давлат раҳбари 23 октябрь куни янги агентликнинг вазифаларини белгилаб берувчи фармонни имзолади.