Ўзбекистон ва АҚШ Эксимбанки ҳамкорликни кенгайтирмоқчи

Ўзбекистон ва АҚШ Экспорт-импорт банки қатор тармоқлардаги йирик лойиҳаларни молиялаштириш бўйича ҳамкорликни кенгайтириш ниятида. Бу ҳақда 6 ноябрь куни Вашингтонда президент Шавкат Мирзиёев ва банк бош директори Жон Йованович ўртасидаги учрашувда сўз борди.

Президент матбуот хизмати хабарига кўра, гап қўшма дастур асосидаги энергетика, муҳим минераллар, транспорт, қишлоқ хўжалиги, ахборот технологиялари ва бошқа устувор йўналишлардаги лойиҳалар ҳақида кетмоқда.

АҚШ Эксимбанкининг миллий авиапаркни модернизация қилиш ва Boeing самолётларини етказиб беришдаги иштирокига алоҳида эътибор қаратилди.

Шавкат Мирзиёевнинг сентябрь ойидаги АҚШга аввалги ташрифи чоғида Uzbekistan Airways ва Boeing 14 та Boeing 787−9 Dreamliner самолётини харид қилиш ва яна 8 та шундай самолётни опцион сифатида етказиб бериш бўйича шартнома тузганди. Етказиб бериш 2031 йилда бошланади. Октябрь ойи охирида президент Ўзбекистон авиакомпаниялари томонидан фойдаланиладиган самолётлар паркини ҳозирги 105 тадан 180 тага етказиш ҳақидаги фармонни имзолаган.

Учрашувда Узоқ муддатли шериклик режасини ишлаб чиқиш бўйича келишувга эришилди.

Шундан сўнг президент иштирокида Шзбекистон Инвестициялар, саноат ва савдо вазирлиги ва АҚШ Эксимбанки ўртасида Қўшма лойиҳаларни молиялаштириш тўғрисидаги битим алмашилди.

Эксимбанк ҳукуматнинг расмий экспорт-кредит агентлиги бўлиб, АҚШ компанияларининг ташқи иқтисодий фаолиятини қўллаб-қувватлайди ҳамда уларга суғурта, кафолат ва кредит воситаларини тақдим этади.