АҚШ Халқаро молиявий тараққиёт корпорацияси Тошкентда ваколатхона очиши мумкин

АҚШ Халқаро молиявий тараққиёт корпорацияси (DFC) Ўзбекистонда ўз ваколатхонасини очишни режалаштирмоқда. Бу ҳақда президент Шавкат Мирзиёев ва DFC бош директори Бен Блэк ўртасида 6 ноябрь куни Вашингтонда бўлиб ўтган учрашувда муҳокама қилинди, деб хабар берди президент матбуот хизмати.

Шунингдек, устувор лойиҳаларни молиялаштириш учун қўшма инвестиция платформасини яратишни жадаллаштириш, кичик бизнесни қўллаб-қувватлаш масалалари ҳам муҳокама қилинди.

Ўзбекистон президенти корпорациянинг инфратузилма лойиҳаларини амалга оширишда давлат-хусусий шериклик асосида иштирок этиши муҳимлигини таъкидлади, дейилади хабарда.

DFC — ривожланаётган мамлакатларда инфратузилма ва саноат лойиҳаларини амалга ошириш учун хусусий капитални сафарбар қилиш билан шуғулланадиган АҚШнинг миллий ривожланиш институти.

АҚШ Давлат департаментининг Ўзбекистоннинг 2024 йилдаги инвестицион муҳити тўғрисидаги ҳисоботига кўра, DFC мамлакатда 1992 йилда (Хорижий хусусий инвестиция корпорацияси, Overseas Private Investment Corporation, OPIC сифатида) ўз фаолиятини бошлаган ва умумий қиймати 231 миллион доллар миқдорида кредитлар берган. DFC’нинг (OPIC) сўнгги лойиҳаси 2011 йилда тасдиқланган. Корпорацияда бир нечта лойиҳалар кўриб чиқилмоқда.

2021 йил январь ойида Ўзбекистон ва DFC ўртасида АҚШ, Исроил ва БАА томонидан ташкил этилган Абҳарам (Иброҳим) жамғармасини қўллаб-қувватлаш учун 50 миллион доллар ажратиш тўғрисида келишув имзоланганди. Шундан сўнг жамғарма минтақавий иқтисодий ҳамкорликни ривожлантириш учун хусусий сектор бошчилигидаги инвестициялар ва ривожланиш ташаббусларига 3 миллиард доллардан ортиқ маблағ жалб этишни мақсад қилган.

Ўша ойда Ўзбекистон, Қозоғистон ва DFC вакили сифатида АҚШ беш йил давомида камида 1 миллиард доллар жалб этиш мақсадида Марказий Осиё инвестиция ҳамкорлигини ташкил этишини эълон қилганди.