Энергетика, хомашё, логистика ва IT. Мирзиёев — Ўзбекистон-АҚШ стратегик шериклик йўналишлари тўғрисида

Ўзбекистон президенти Шавкат Мирзиёев 6 ноябрь куни Вашингтон шаҳрида АҚШнинг етакчи компаниялари, инвестиция фондлари ва молиявий институтлари раҳбарлари билан учрашув ўтказди.

Давлат раҳбари ўз нутқида Ўзбекистон билан АҚШ ўртасидаги стратегик шерикликнинг асосий йўналишларини кўрсатиб ўтди.

«Биз Ўзбекистонда кучли, технологик ва адолатли иқтисодиёт қурмоқдамиз. 2030 йилга бориб саноат ишлаб чиқариш ҳажмини икки баробарга ошириш ва мамлакат маҳсулотларининг учдан бир қисми юқори қўшилган қийматга эга бўлишига эришиш ниятидамиз», — деди у.

Президентнинг сўзларига кўра, ушбу мақсадларга эришиш учун мамлакатга Америка технологиялари ҳар қачонгидан ҳам кўпроқ зарур.

«Бу ҳар йили камида 35 миллиард долларлик инвестицияларни жалб қилиш ва бутун мамлакат бўйлаб 250 мингга яқин янги иш ўрнини яратиш имконини беради. Буларнинг барчаси келажак учун мустаҳкам пойдевор бўлади», — дея таъкидлади Шавкат Мирзиёев.

Энергетика

Президент энергетикани ҳамкорликнинг биринчи устувор йўналиши деб атади. 2030 йилга бориб Ўзбекистонда 18−20 ГВт қайта тикланадиган қувватга эга янги авлод энергетика тизимини яратиш режалаштирилган бўлиб, барча электр энергиясининг ярмидан кўпи қуёш ва шамол энергияси ҳисобидан ишлаб чиқарилади.

Унинг қайд этишича, замонавий тармоқлар ва сақлаш тизимлари туфайли энергия таннархи 15 фоизга арзонлашади.

«Бу минтақадаги энг арзон тарифлардан бири бўлиб, саноатни жадал ривожлантириш ва инвестициялар жалб қилишга замин яратади. АҚШ билан биргаликда тоза генерациядан „ақлли“ тармоқлар ва энергетика платформаларига ўтишни мақсад қилганмиз», — деди президент.

Хомашё

Шерикликнинг иккинчи йўналиши сифатида стратегик хомашёни қазиб олиш ва қайта ишлаш соҳаси қайд этилди.

«Ўзбекистон уран, мис, вольфрам, молибден ва графит қазиб олиш ва чуқур қайта ишлашни ривожлантирмоқда. Биз Америка Қўшма Штатлари билан муҳим минералларни етказиб беришнинг ишончли занжирини яратишга ва қайта ишлашнинг замонавий технологияларини жорий этишга тайёрмиз», — деди Мирзиёев.

Унинг сўзларига кўра, бу энергетика ва машинасозликдан тортиб, аккумулятор тизимлари ва электротранспортгача бўлган янги илғор ишлаб чиқаришларга замин яратади.

Логистика

Учинчи йўналиш сифатида президент транспорт инфратузилмасини ривожлантириш ва минтақа интеграциясини белгилаб берди.

«Биз автомобиль ва темирйўлларни, юк терминаллари ва аэропортларни модернизация қилмоқдамиз. Ушбу лойиҳалар 2030 йилга бориб логистика харажатларини 25 фоизга камайтириш, юк ташиш ҳажмини 40 фоизга ошириш, транспорт ва инфратузилмани ривожлантиришга 12 миллиард доллардан ортиқ маблағ йўналтириш имконини беради», — деди у.

Мирзиёев Ўзбекистон АҚШ билан биргаликда логистика ва терминалларни бошқариш бўйича лойиҳаларни амалга оширишга тайёрлигини қўшимча қилди.

IТ

Ўзбекистонда сунъий интеллект ва рақамлаштиришни ривожлантириш дастурлари қабул қилинган. Унинг сўзларига кўра, Американинг Google, Meta ва Nvidia компаниялари бу соҳага қизиқиш билдирмоқда.

Шахсий маълумотларни сақлаш ва рақамли платформаларни тартибга солиш масалаларига алоҳида эътибор қаратилмоқда.

«Биз америкалик ҳамкорлар билан биргаликда қонунчиликни янгилаш бўйича ишларни якунлаяпмиз. Бу янги технологик шериклик, жумладан, Apple Pay ва Google Pay глобал тўлов тизимларини ишга тушириш, рақамли академиялар ва стартап ҳаблар тармоғини яратиш имконини беради», — деди Шавкат Мирзиёев.

Президентнинг маълум қилишича, томонлар АҚШ савдо вазири Ховард Латник билан биргаликда уч йиллик саноат кооперацияси дастури бўйича келишиб олган.

Халқаро молиявий ривожланиш корпорацияси (DFC) ва АҚШ Эксимбанки раҳбарлари билан лойиҳаларни қўллаб-қувватлаш учун замонавий молиявий воситалардан фаол фойдаланишга келишиб олинган.

«Биз сиёсий ва ҳукумат даражасида ишончли ишонч муносабатларини ўрнатиб улгурдик. Энди бизнес билан шерикликни йўлга қўйиб, уни аниқ лойиҳалар билан бойитиб, амалга оширишга ўтиш вақти келди», — деди президент.