«АҚШ билан ҳамкорлигимиз кимгадир қарши эмас, балки бирор мақсад йўлида қурилиши лозим» — СМТИ директори
«Бугун биз умумий қарашни умумий ютуққа айлантириш учун тарихий имкониятга эгамиз», — деди у 6 ноябрь куни Оқ уйда бўлиб ўтган «C5+1» («Марказий Осиё — АҚШ») саммити якунларига бағишланган тадбирда.
«Саммит шунчаки мулоқотнинг навбатдаги раунди эмас. Бу Қўшма Штатлар томонидан минтақавий консолидация жараёнини қўллаб-қувватлаш, Марказий Осиё мамлакатларининг мустақиллиги ва эркинлигини мустаҳкамлаш, шунингдек, янги воқеликни — янада жипслашган, олдиндан айтиб бўладиган ва дунёнинг етакчи давлатлари учун самарали ҳамкор бўла оладиган Янги Марказий Осиёнинг пайдо бўлишини эътироф этишнинг ифодаси бўлди», — деди у.
«Аввалги рақобат ўрнига [минтақа мамлакатлари] барқарор ривожланиш фақат ҳамкорлик орқали бўлиши мумкинлигини тушунишди. Бугун минтақа бир овоздан гапирмоқда ва умумий вазифаларни ҳал қилишда етуклик ва масъулиятни намойиш этмоқда», — деди Элдор Арипов.
Саммит, шунингдек, Марказий Осиёнинг Евроосиё янги геоиқтисодий динамикасининг шаклланаётган маркази сифатида эътироф этилишига айланди, дея давом этди СМТИ раҳбари. Минтақа стратегик мавқеи, ресурслари ва ўсиб бораётган салоҳияти билан етакчи давлатларнинг эътиборини тобора кўпроқ жалб этмоқда.
«Тенг ҳуқуқлилик, очиқлик ва манфаатлар мувозанати тамойилларига асосланган ўзаро ҳамкорликнинг янги архитектураси босқичма-босқич шаклланмоқда. Марказий Осиё йирик ўйинчилар ўртасидаги рақобат эмас, балки ҳамкорлик макони бўлиб қолиши керак», — дея таъкидлади у.
Элдор Ариповнинг фикрича, АҚШ минтақанинг стратегик автономияси ва технологик ривожланишига кўмаклашиш орқали Марказий Осиёнинг очиқлиги ва барқарорлигини сақлашда муҳим роль ўйнаши мумкин.
«Гап нафақат энг янги технологиялардан фойдаланиш, балки инсон капиталига — ёшларимизнинг билими, кўникмалари ва касбига сармоя киритиш ҳақида бормоқда», — деди СМТИ раҳбари.
Муҳокамада АҚШ маъмурияти ва Конгресси, экспертлар ва таҳлилий ҳамжамият вакиллари иштирок этди. Тадбирга Атлантика кенгашининг Евроосиё маркази катта директори, АҚШнинг Ўзбекистон ва Украинадаги собиқ элчиси Жон Ҳёрбст модераторлик қилди (Gazeta саммит арафасида у билан интервьюни эълон қилганди). Ўзбекистондан Сенат раисининг биринчи ўринбосари Содиқ Сафоев ҳам иштирок этди.