Шавкат Мирзиёев Дональд Трампга Регистоннинг кичик нусхаси ва унинг китоби таржимасини совға қилди

7 ноябрь куни Шавкат Мирзиёев Вашингтонга ташрифида АҚШ президенти Дональд Трампга иккита совға берди. Бу икки президентнинг учрашуви вақтида олинган суратлардан маълум бўлади.

Суратларда Оқ уйдаги музокаралар столида Регистон мажмуасининг кичик нусхасини кўриш мумкин. Макет тўлиқ тилла рангда.

Ўзбекистон президентининг иккинчи совғаси эса Дональд Трампнинг ўзи ёзган «The Art of the Deal» (Келишув санъати) китобининг ўзбек тилидаги таржимаси бўлди.

Китоб 1987 йилда Дональд Трамп ва журналист Тони Швартс томонидан ёзилган. Бу қисман мемуар ва қисман бизнес бўйича маслаҳатлар китоби бўлиб, Трампга тегишли бўлган биринчи китоб.

Трамп уни ўзининг энг фахрли ютуқларидан бири ва Инжилдан кейин иккинчи энг севимли китоби сифатида тилга олади.