Шавкат Мирзиёев расмий ташриф билан Японияга боради
Токиода Япония императори Нарухито, бош вазир Санаэ Такаичи, парламент раҳбарияти, ҳукумат амалдорлари, сиёсий партиялар вакиллари ва етакчи Япония университетлари ректорлари билан учрашувлар ва музокаралар режалаштирилган.
Кун тартибидан Ўзбекистон — Япония стратегик шериклик муносабатлари ва кўп қиррали ҳамкорлигини янада кенгайтириш ва чуқурлаштириш масалалари ўрин олган.
Ишбилармонлик дастурига Япониянинг йирик компаниялари ва молия институтлари раҳбарлари билан учрашувлар киради. Томонлар савдо-иқтисодий ҳамкорликни кенгайтириш ва инвестиция лойиҳаларини илгари суриш масалаларини муҳокама қилиш ниятида. Ташриф якунида икки томонлама ҳужжатлар тўплами имзоланиши кутилмоқда.
Президент, шунингдек, «Марказий Осиё + Япония» мулоқоти давлат раҳбарларининг биринчи саммитида иштирок этади. Иштирокчилар «яшил» иқтисодиёт ва барқарор тараққиёт, ўзаро боғлиқлик ва минтақавий шерикликни мустаҳкамлаш ҳамда инсон ресурсларини ривожлантириш соҳаларидаги ҳамкорлик истиқболларини муҳокама қилади.
Саммит якунлари бўйича Токио декларациясини қабул қилиш режалаштирилган.
«Япония — Марказий Осиё» (C5+) саммити ўтган йилнинг август ойида Қозоғистонда ўтказилиши режалаштирилган эди, аммо бекор қилинди. Ўша пайтда Фумио Кисида бошчилигидаги ҳукумат Тинч океани соҳилидаги Нанкай водийсида мегазилла юз бериши мумкинлиги ҳақидаги фавқулодда огоҳлантиришга жавоб беришга эътибор қаратганди.
Gazeta Марказий Осиё мамлакатлари ва глобал сиёсий майдондаги энг муҳим давлатлардан бири ўртасидаги ўзаро муносабатларнинг ушбу формати қандай ривожлангани ҳақида ёзганди — ташқи ишлар вазирлари даражасидаги учрашувлардан тортиб, миллий раҳбарлар ўртасидаги музокараларгача.