1 февралдан ID карта олаётганларга ЭРИ (ЭЦП) бепул берилади

2026-йилдан бошлаб Ўзбекистонда миграция ва шахсни идентификация қилиш соҳасида бир қатор янги тартиблар жорий этилади. Бу ҳақда ички ишлар органларининг миграция ва персоналлаштириш йўналишидаги фаолиятини рақамлаштиришга қаратилган қарорда белгиланди.

Қарорга мувофиқ, 2026 йил 1 майдан эътиборан Ички ишлар вазирлиги ҳузуридаги Миграция ва персоналлаштириш департаментига электрон кириш визаси асосида Ўзбекистонга келган чет эл фуқаролари ҳамда фуқаролиги бўлмаган шахсларнинг электрон визалари амал қилиш муддатини бир маротаба 30 кунгача узайтириш ваколати берилади.

Шунингдек, чет эл фуқароларига Ўзбекистон ҳудудида меҳнат фаолиятини амалга ошириш ҳуқуқини берувчи тасдиқномани расмийлаштириш ваколати ҳам департамент ва унинг ҳудудий бошқармаларига ўтказилади.

2026 йил 1 сентябрдан эса талабалар учун янги тартиб жорий этилади. Унга кўра, талабалар ётоқхонасига жойлашиш бўйича шартнома тузилиши билан бир вақтда уларни турган жойи бўйича рўйхатга олишнинг композит механизми амалга оширилади.

Бундан ташқари, 2026 йил 1 февралдан жисмоний шахсларга ID-карталар биринчи марта расмийлаштирилганда, унинг чипига киритиладиган электрон рақамли имзо сертификати бепул тақдим этилади. Шу билан бирга, фуқаролар “Электрон ҳукумат” тизими фойдаланувчиларини идентификациялаш ягона ахборот тизимида автоматик тарзда ва бепул рўйхатдан ўтказилади.

Мазкур ўзгаришлар давлат хизматларини кўрсатиш жараёнларини соддалаштириш, рақамлаштириш даражасини ошириш ҳамда фуқаролар ва хорижий шахслар учун қулай шарт-шароитлар яратишга қаратилган.