Андижон вилоятида инспектор пул талаб қилганлик учун қўлга олинди

Андижон вилояти Балиқчи туманининг фавқулодда вазиятлар бўлими инспектори пора талаб қилганликда гумонланиб қўлга олинди. Бу ҳақда Давлат хавфсизлик хизмати матбуот хизмати хабар берди.

Идора маълумотларига кўра, мансабдор шахс гўё мавжуд таниш-билишларига таяниб, фуқаронинг қариндошини тегишли тузилмага ишга жойлаштириб беришни ваъда қилиб, бунинг эвазига 1 минг 800 АҚШ доллари талаб қилган.

Инспектор ҳуқуқни муҳофаза қилиш органлари ходимлари томонидан жамоат овқатланиш шохобчаларидан бирида пул маблағларини олаётган вақтда ушланган.

Мазкур ҳолат юзасидан Жиноят кодексининг тегишли моддалари билан жиноят иши қўзғатилган. Тергов ҳаракатлари олиб борилмоқда.