Ўзбекистон одам савдосига қарши курашни кучайтирмоқда: ЕХҲТ махсус вакилининг ташрифи доирасида ўқув курси ўтказилди

Ўзбекистонда ҳуқуқни муҳофаза қилувчи органлар ходимлари ҳамда одам савдосига қарши кураш бўйича мутахассислар ушбу муаммога қарши саъй-ҳаракатларни янги босқичга олиб чиқмоқда. Жумладан, ЕХҲТнинг одам савдосига қарши кураш бўйича махсус вакили ва координатори Кери Жонстоннинг расмий ташрифи доирасида рақамли технологиялар орқали амалга ошириладиган эксплуатацияга қарши кураш масалаларига бағишланган икки кунлик ўқув курси ташкил этилди. Тадбирнинг мақсади одам савдосининг олдини олиш ва унга барҳам бериш йўлида стратегик ҳамкорлик ҳамда амалий фаолиятни кучайтиришдан иборат бўлди.

Кери Жонстон таъкидлашича, одам савдоси қурбонларини ҳимоя қилиш ва унинг олдини олиш нафақат кучли сиёсат, балки яхши тайёрланган мутахассисларни ҳам талаб қилади. Унинг фикрича, Ўзбекистонда амалга оширилаётган ислоҳотлар мустаҳкам пойдевор яратмоқда, малака оширишга қаратилган аниқ чоралар эса, айниқса технологиялар орқали содир этиладиган жиноятларга қарши курашда, мажбуриятларни амалий ҳаракатларга айлантиришга ёрдам бермоқда.

2026 йил 12–13 февраль кунлари Тошкент шаҳрида Ўзбекистон Республикаси Ҳуқуқни муҳофаза қилиш академиясида ўтказилган ўқув курсида Академия, Бош прокуратура, Ички ишлар вазирлиги, ИИВ академияси, Рақамли технологиялар вазирлиги, Болалар ҳуқуқлари бўйича вакил ҳамда Давлат меҳнат инспекцияси вакиллари иштирок этди.

Курс ЕХҲТ томонидан ишлаб чиқилган, технологиялар ёрдамида содир этиладиган одам савдоси ҳолатларини тергов қилиш бўйича ўқув дастурига асосланди. Тренинг мазкур мураккаб эксплуатация шаклига қарши курашиш кўникмаларини мустаҳкамлашга қаратилди. Дастур иштирокчиларга аҳолининг заиф қатламларига тобора кўпроқ таъсир кўрсатаётган эксплуатация усулларини аниқлаш, тергов қилиш ва олдини олиш бўйича зарур билимларни етказишни назарда тутди. Бу усуллар қаторига онлайн ёллаш схемалари, мессенжерлар ва ижтимоий тармоқлардан суиистеъмол қилиш, шунингдек сунъий интеллектдан фойдаланиш киради.

Кери Жонстоннинг таъкидлашича, ўқув курси ҳуқуқни муҳофаза қилувчи органлар ходимларига проактив онлайн терговлар ўтказиш, очиқ ахборот манбалари билан ишлаш ва қурбонлар манфаатларига йўналтирилган ёндашув бўйича амалий кўникмаларни тақдим этади. Шу билан бирга, бу таълим муассасаларига технологиялар орқали амалга ошириладиган одам савдосига қарши кураш бўйича ўқитиш усулларини мослаштириш имконини беради.

Иштирокчилар технологиялар ёрдамида содир этиладиган одам савдоси ҳолатларини тергов қилиш бўйича чуқур билимларга эга бўлиб, тергов усулларини амалий мисоллар асосида ўқитиш ва қурбонлар манфаатларига йўналтирилган ёндашув билан уйғунлаштиришни ўргандилар. Шунингдек, улар ушбу модулларни амалдаги ҳуқуқни муҳофаза қилувчи органлар ходимлари ва курсантлар учун ўтказиш кўникмаларини ҳам эгалладилар.

ЕХҲТнинг Ўзбекистондаги лойиҳалар координатори, элчи Антти Карттунен ташкилот Ўзбекистоннинг одам савдосига қарши курашиш бўйича комплекс ёндашувини қўллаб-қувватлашда давом этаётганини таъкидлади. Унинг сўзларига кўра, ҳуқуқни муҳофаза қилувчи органлар ходимларини тайёрлашга сармоя киритиш ва замонавий тергов воситаларини жорий этиш орқали мамлакат одам савдосининг олдини олиш, қурбонларни ҳимоя қилиш ва жиноятчиларнинг янги, айниқса рақамли технологияларга боғлиқ усулларига қарши самарали жавоб бериш салоҳиятини мустаҳкамламоқда.

Ташриф доирасида Кери Жонстон ушбу соҳадаги ташаббусларда иштирок этаётган қатор юқори лавозимли мансабдорлар билан ҳам учрашувлар ўтказди. У Ўзбекистоннинг мазкур йўналишдаги ютуқларини эътироф этиб, келгусидаги ривожланиш истиқболларини муҳокама қилди ҳамда мамлакатнинг одам савдоси учун жазоларни кучайтиришга қаратилган Жиноят кодексига киритилган ўзгартишлар ва болаларни зўравонликнинг барча шаклларидан ҳимоя қилишга қаратилган янги қонун каби ташаббусларини қўллаб-қувватлашини билдирди.