Ўзбекистонда пенсионерлар янги фирибгарлик схемаси ҳақида огоҳлантирилди
Ўзбекистонда телефон орқали фирибгарлик ҳолатлари сони ошиб бормоқда ва бундай жиноятларнинг қурбонларига кўпинча пенсионерлар айланмоқда. Номаълум рақамлардан қўнғироқ қилган шахслар гўёки пенсия миқдори оширилиши ҳақида хабар бериб, фуқароларнинг шахсий маълумотлари ва банк карталари реквизитларини қўлга киритишга уринишмоқда.
Ўзбекистон Республикаси Пенсия жамғармаси маълум қилишича, фирибгарлар ўзларини банк ёки жамғарма ходими сифатида таништириб, келаси ойдан пенсия оширилишини айтишмоқда. «Қайта ҳисоб-китобни расмийлаштириш» учун улар паспорт маълумотлари, банк картаси рақами, ЖШШИР (ПИНФЛ) ёки SMS орқали келган тасдиқлаш кодини сўрашмоқда. Шу орқали фуқароларни чалғитиб, маълумотлар берилмаса пенсия қайта ҳисобланмаслигини таъкидлашмоқда.
Идорада таъкидланишича, жамғарма ходимлари ҳеч қачон телефон орқали шахсий маълумотлар ёки SMS-кодларни сўрамайди.
Фуқароларга паспорт маълумотлари, банк карталари реквизитлари ва бошқа махфий ахборотларни бегона шахсларга бермаслик тавсия этилмоқда. Шубҳали қўнғироқлар бўлган тақдирда, Пенсия жамғармасининг 1271 ишонч телефонига ёки ички ишлар органларининг 102 рақамига мурожаат қилиш лозим.
Жамғарма пенсионерлар ва уларнинг яқинларини ҳушёр бўлишга ва фирибгарлар найрангларига алданмасликка чақирди.