2025-йил Ўзбекистон – Беларусь товар айирбошлаши қарийб 1 млрд долларга етди
Учрашув аввалида Беларусь Бош вазири давлат раҳбарига Александр Лукашенкоoнинг самимий саломи ва эзгу тилакларини етказди.
Музокараларда олий даражада эришилган келишувларни амалга ошириш доирасида Ўзбекистон – Беларусь кўп қиррали шериклик муносабатларини янада кенгайтириш масалалари муҳокама қилинди.
Айниқса, савдо-иқтисодий ҳамкорлик юқори босқичга кўтарилгани қайд этилди. Ўтган йили ўзаро товар айирбошлаш ҳажми 25 фоизга ўсиб, қарийб 1 миллиард долларга етган. Етакчи компаниялар иштирокида устувор тармоқларда кооперация алоқалари изчил кенгаймоқда.
Томонлар машинасозлик, электротехника, фармацевтика, тўқимачилик ва озиқ-овқат саноати, қишлоқ хўжалиги каби соҳаларда қўшма лойиҳаларни илгари суриш орқали иқтисодий ҳамкорликнинг янги кун тартибини шакллантириш муҳимлигини таъкидлади.
Шунингдек, ҳудудлараро алоқаларни мустаҳкамлаш, маданий-гуманитар алмашинувларни фаоллаштириш масалаларига алоҳида эътибор қаратилди.