BMW M4 иштирокидаги ЙТҲ бўйича шов-шувли тафсилотларни очиқлади

Тошкент шаҳар ИИББ пойтахтда содир бўлган йўл-транспорт ҳодисаси юзасидан батафсил маълумот берди. Мазкур авария оқибатида ЙПХ инспектори оғир тан жароҳати олган.

Тергов маълумотларига кўра, қимматбаҳо спорткар — BMW M4 рули ортида 2010 йилда туғилган мактаб ўқувчиси бўлган. Аниқланишича, у муқаддам ҳам ҳайдовчилик гувоҳномасисиз транспорт воситасини бошқаргани учун ҳуқуқ-тартибот органлари эътиборига тушган.

Терговда автомобил тарихи ҳам алоҳида ўрганилган. Маълум бўлишича, BMW M4 2002 йилда туғилган Лейла Атадианова номида рўйхатдан ўтган. 2024 йил бошидан буён машина 18 марта бошқарув ҳуқуқига эга бўлмаган шахсларга берилган. Шунингдек, ушбу транспорт воситаси ҳисобида йўл ҳаракати қоидаларини қўпол равишда бузиш билан боғлиқ 37 та ҳолат қайд этилган.

Ҳозирда ўсмирнинг отаси Зафаржон Кучкунов ва бошқа алоқадор шахсларга нисбатан тергов ҳаракатлари олиб борилмоқда. Ўзбекистон Республикаси Жиноят кодексининг 226-моддаси («Маъмурий назорат қоидаларини бузиш») билан жиноят иши қўзғатилган.

Иш материалларида Uzbelas номи билан танилган блогер Асадбек Жумаев ҳам тилга олинган.