Тошкентда ноқонуний крипта савдоси билан шуғулланганлар қўлга олинди

Пойтахтда ўтказилган тезкор тадбирда лицензиясиз крипто-активлар савдоси билан шуғулланган икки нафар шахснинг фаолиятига чек қўйилди.

Маълум қилинишича, Шайхонтоҳур туманида яшовчи 2002 ва 2004 йилларда туғилган фуқаролар ижтимоий тармоқлар орқали ноқонуний криптовалюта айланмаси билан шуғулланиб келган. Улар 2025 йил июлидан 2026 йил январигача 793 минг USDT миқдорида операцияларни амалга оширгани аниқланган.

Тезкор тадбир давомида компьютер жамланмаси, 22 та уяли телефон, SIM-карталар ва 200 дан ортиқ банк пластик карталари мусодара қилинган.

Ҳолат юзасидан Жиноят кодексининг тегишли моддаси билан жиноят иши қўзғатилиб, тергов ҳаракатлари олиб борилмоқда.