2026–2027 ўқув йили учун биринчи синфга қабул тартиби тасдиқланди
Тасдиқланган қоидаларга кўра, аризаларни қабул қилиш икки босқичда амалга оширилади:
— 20 июндан 31 июлгача — бириктирилган микроҳудуд доирасида;
— 1 августдан 31 августгача — микроҳудуддан ташқари.
Ҳужжатларни my.gov.uz ва my.maktab.uz платформалари орқали онлайн тарзда топшириш мумкин.
Жорий йилда онлайн қабул тизими қамрови сезиларли даражада кенгайтирилди: туман ва шаҳарлар сони 64 тадан 135 тага, мактаблар сони эса 1956 тадан 5689 тага етказилди. Бу эса кўпроқ ота-оналарга рақамли хизматлардан фойдаланиш имконини беради.
Биринчи синфга қабул қилинадиган болалар — қабул йилида 7 ёшга тўладиганлардир. Демак, 2026–2027 ўқув йилида 2019 йил 31 декабргача туғилган болалар қабул қилинади.
Кутилишича, рақамли имкониятларнинг кенгайиши ариза топшириш жараёнини соддалаштириб, уни янада шаффоф ва қулай қилади.