Ўзбекистонда хорижда ишга жойлаштиришни ваъда қилган фирибгарлар қўлга олинди

Ўзбекистонда Давлат хавфсизлик хизмати ходимлари Бош прокуратура ҳузуридаги департамент билан ҳамкорликда фуқароларга хорижда ишга жойлаштиришни ваъда қилган икки нафар фирибгар фаолиятига чек қўйди.

Идора маълумотига кўра, ҳолатлар Навоий ва Қашқадарё вилоятларида аниқланган.

Биринчи ҳолатда Навоий вилоятидаги туристик фирма раҳбари Хатирчи туманида яшовчи фуқарога Болгарияда ишга жойлаштириб беришни ваъда қилган. Ҳужжатларни расмийлаштириш учун у 3000 доллар олган ва шундан сўнг қўлга олинган.

Иккинчи ҳолатда Қашқадарё вилоятида Тошкент вилоятидан бўлган шахс икки нафар фуқарони Исроилга ишга юбориш учун 20 минг доллар талаб қилган. У 5 минг доллар олаётган вақтида ашёвий далиллар билан ушланган.

Ҳар икки ҳолат юзасидан жиноят ишлари қўзғатилган.

Давлат хавфсизлик хизмати фуқароларни хорижда иш излашда эҳтиёткор бўлишга ва фақат расмий тузилмалар, жумладан Ўзбекистон Республикаси Вазирлар Маҳкамаси ҳузуридаги Миграция агентлиги ёки лицензияга эга хусусий агентликларга мурожаат қилишга чақирди.

Шунингдек, фуқароларга ижтимоий тармоқлардаги шубҳали таклифларга ишонмаслик тавсия этилди.