Ўзбекистонда ўртача маош 6,8 млн сўмга етди

2026 йил биринчи чорак якунларига кўра, Ўзбекистонда ўртача ойлик иш ҳақи 6 млн 825 минг сўмни ташкил этди ва ўтган йилнинг шу даврига нисбатан 17,4 фоизга ошди. Бу ҳақда Миллий статистика қўмитаси маълум қилди.

Энг юқори кўрсаткичлар Тошкент шаҳрида — 11,684 млн сўм, Навоий вилоятида — 8,453 млн сўм ва Тошкент вилоятида — 6,169 млн сўмни ташкил этди. Энг паст ўртача маошлар Қашқадарё, Сурхондарё ва Фарғона вилоятларида қайд этилган.

Статистика маълумотларига кўра, фақат Тошкент шаҳри ва Навоий вилоятида иш ҳақи мамлакат бўйича ўртача кўрсаткичдан юқори бўлган. Ҳудудлар ўртасидаги энг юқори ва энг паст маошлар орасидаги фарқ тахминан 2,5 баравар даражасида сақланиб қолмоқда.

Энг юқори маошлар молия сектори, ахборот ва алоқа соҳаси, транспорт тармоғи ва саноатда сақланиб қолмоқда. Шу билан бирга, таълим ва соғлиқни сақлаш соҳасидаги иш ҳақи мамлакат бўйича ўртача даражадан пастлигича қолмоқда.

Маълумотларга кўра, таълим соҳасида ўртача маош 4,615 млн сўм, соғлиқни сақлаш соҳасида эса 4,111 млн сўмни ташкил этган.

Экспертлар таъкидлашича, сўнгги йилларда иш ҳақи энг тез ўсган соҳалар қаторига кўчмас мулк, молия ҳамда ахборот-коммуникация технологиялари киради.