Навоийда мактаб ўқувчилари йўл-транспорт ҳодисасига учради

Навоий вилояти Кармана туманида мактаб ўқувчилари иштирокида йўл-транспорт ҳодисаси содир бўлди, натижада бир ўсмир ҳалок бўлди, яна бир нафари жароҳат олди.

Авария 22 апрель куни соат 21:00 атрофида “Малик” маҳалласида юз берган. Вилоят ЙҲХБ маълумотига кўра, Ҳазара қишлоғидаги 22-мактабнинг 9- ва 11-синф ўқувчилари бўлган Cobalt автомобили юқори тезликда бошқарувни йўқотиб, йўлдан чиқиб кетган.

ЙТҲ натижасида 16 ёшли ўқувчи шифохонада вафот этган, иккинчи ўсмир эса тан жароҳатлари билан касалхонага ётқизилган. Автомобиль жиддий шикастланган.

Ҳодисадан сўнг ЙҲХБ ходимлари юқори синф ўқувчилари билан профилактик учрашув ўтказди.