Президент Самарқандда Имом Бухорий мақбарасини зиёрат қилди
Анъанага кўра, сафар Имом Бухорий мақбарасини зиёрат қилишдан бошланди. Муқаддас мажмуада Қуръондан суралар тиловат қилиниб, буюк муҳаддис Имом Бухорий хотирасига дуо қилинди.
Қайд этилишича, давлат раҳбари ташаббуси билан мажмуа Имом Бухорийнинг ислом оламидаги юксак мақоми ва бой маънавий меросини инобатга олган ҳолда тўлиқ реконструкция қилинган. Бу ерда зиёратчилар учун замонавий ва қулай шароитлар яратилган.
Рамазон ҳайити арафасида янгиланган мажмуа яна ташриф буюрувчилар учун очилди. Байрам куни уни 60 мингдан ортиқ киши зиёрат қилди. Бугунги кунда мажмуа бир кунда 65 минг нафаргача зиёратчини қабул қилиш имкониятига эга, илгари эса бу кўрсаткич тахминан 12 мингни ташкил этган.
Маълумотларга кўра, очилгандан кейинги биринчи ой давомида мажмуага бир миллиондан ортиқ Ўзбекистон фуқаролари ва хорижий меҳмонлар ташриф буюрган.
Ташриф давомида Президент инфратузилмани янада ривожлантириш бўйича қатор топшириқлар берди. Жумладан, автотураргоҳларни кенгайтириш, сайр ҳудудларини ободонлаштириш ва зиёратчилар учун янада қулай шароитлар яратиш масалалари муҳокама қилинди.
Шунингдек, амалга оширилаётган ишлар самарадорлигини мунтазам таҳлил қилиш ва ташриф буюрувчилар учун шарт-шароитларни янада такомиллаштириш зарурлиги таъкидланди. Имом-хатиблар малакасини ошириш масаласига алоҳида эътибор қаратилди — бу борада мамлакатнинг барча ҳудудларидан мутахассисларни жалб этиш режалаштирилмоқда.
Давлат раҳбари зиёрат маданиятини шакллантириш, муқаддас жойлар ва қабристонларни ободонлаштириш, шунингдек, марҳумлар хотирасига ҳурматни мустаҳкамлаш муҳимлигини таъкидлади. Унинг сўзларига кўра, бу ёшларни маънавий-ахлоқий тарбиялаш ва миллий қадриятларни сақлашда муҳим аҳамиятга эга.