«Бойсун баҳори»: Ўзбекистоннинг номоддий маданий мероси
Эртаси тонгданоқ баҳорги фестиваллар учун махсус қурилган туристик мажмуа гўё ари уясидек жонланди. Юзлаб меҳмонлар — маҳаллий аҳоли, республиканинг турли ҳудудларидан келганлар ва хорижий сайёҳлар кенг ҳудудни тўлдирди. Фольклор ва болалар жамоалари Сурхондарё куйлари остида жўшқин рақслар ижро этди. Халқ ўйинлари ўтказилди. Амалий санъат буюмлари билан безатилган ранг-баранг расталар мажмуанинг асосий кўчасини гўё гирляндалар каби безаб турди.
Сурхондарёнинг ҳар бир тумани намойиш қиладиган жиҳатларга эга. Шерабад мазали анорлари ва ноёб туз ғори билан машҳур, Сариосиё — Сангардак шаршараси билан, Термиз — буддавий ёдгорликлари, Ат-Термизий мақбараси ва Қирқ-қиз қалъаси билан танилган. Вилоят туманлари павильонлари ҳар йили ўз экспозицияларини тақдим этади, аммо «Бойсун баҳори» — 2026 фестивали ўзига хос жиҳатлари билан ажралиб туради.
— Бу сафар ҳақиқий этношаҳар барпо этилди. Унда ҳар бир туман ўз турмуш тарзи, маиший жиҳатлари, аҳоли қандай меҳнат қилиши ва даромад топишини намойиш этди. Барча декорациялар табиий материаллардан яратилган бўлиб, яшаш мумкин бўлган маконларга айлантирилди. Масалан, меҳмонлар лой, тош ва туз бўлакларидан қурилган иншоотларга кириб, нафақат кўриш, балки уй-рўзғор буюмларини ушлаб кўриш, хонтахтада ўтириш орқали Сурхондарё анъаналарининг бетакрорлигини ҳис этишлари мумкин, — деди Сурхондарё вилояти ҳокимлиги матбуот котиби Муродбек Давлатов журналистлар учун ўтказилган матбуот анжуманида. — Фестиваль дастуридан ҳаво шарлари шоуи, 150 та замонавий дрон иштирокидаги дрон-шоу ҳам ўрин олган. Шунингдек, кўпкари ва кураш каби миллий спорт ўйинлари анъанавий равишда катта қизиқиш уйғотади, мусобақа ғолибларини қимматбаҳо совғалар кутмоқда.