17 май куни Тошкентда Silk Road Uzbekistan югуришлар сериясининг навбатдаги босқичи бўлиб ўтади
Югуришлар серияси аввал Нукус, Самарқанд ва Бухорода ўтказилиб, минглаб иштирокчиларни жамлади ва ҳозирда ўз географиясини кенгайтирмоқда. Бир трассада профессионал спортчилар, ҳаваскорлар, талабалар ва болали оилалар иштирок этаётгани мазкур форматни янада оммабоп ва жозибадор қилмоқда. Навбатдаги босқич 24 май куни Қўқонда бўлиб ўтади.
Лойиҳа Марказий Осиё югуриш ва спортча юриш академияси, Ўзбекистон Республикаси Олий таълим, фан ва инновациялар вазирлиги ҳамда Ўзбекистон Республикаси Президенти ҳузуридаги Ижтимоий ҳимоя миллий агентлиги томонидан ташкил этилмоқда.
Югуриш ҳамкорлари сифатида “Ўзбектелеком” АЖ, “ASTERIUM” АЖ, “UZAUTO MOTORS” АЖ ва Ўзбекистон Республикаси Ташқи иқтисодий фаолият миллий банки — “Ўзмиллийбанк” АЖ иштирок этмоқда. Уларнинг қўллаб-қувватлаши Ўзбекистонда оммавий спорт ва соғлом турмуш тарзини ривожлантиришга бизнес томонидан қизиқиш ортиб бораётганини кўрсатади.
“Янги Ўзбекистон” боғи тобора спорт ва шаҳар тадбирлари учун муҳим майдонга айланмоқда. Ҳудуднинг кенглиги хавфсизликни таъминлаш ва оммавий старт учун қулай шароит яратиш имконини беради. Silk Road Tashkent мусобақасини ўтказишга профессионал мураббийлар, ҳакамлар ва волонтёрлар жамоаси жалб қилинади.
Тадбир дастуридан 5 ва 10 километр масофаларга Silk Road Uzbekistan стартлари, Kids Run болалар югуришлари ва Talaba Yugur талабалар мусобақалари ўрин олган. Лойиҳа концепцияси спорт ва саёҳатни бирлаштириб, иштирокчиларга шаҳарларни ҳаракат орқали янгича кашф этиш имконини беради.
Talaba Yugur — мамлакатнинг барча ҳудудларида ўтказиладиган талабалар югуришлари сериясидир. Аввал иштирокчилар ҳудудий босқичларда беллашади, кейин эса ғолиблар Тошкентда жамланиб, совринли ўринлар, пул мукофотлари ва стипендияга устамалар учун курашади. Кўпчилик учун бу спорт мусобақасидаги илк тажриба бўлиб, фаол ҳаёт тарзига қизиқишни шакллантиради.
Silk Road югуришида иштирок этиш нархи танланган масофага қараб 100 минг сўмдан 200 минг сўмгача этиб белгиланган. Иштирокчилар старт пакетига эга бўлади. Унга чипли рақам, рюкзак, кепка, медаль ва Испаниянинг Joma брендига тегишли спорт футболкаси киради. Футболкалар замонавий технологик материаллардан тайёрланган бўлиб, енгиллик, шамоллатиш ва югуриш вақтида қулайликни таъминлайди.
5 ва 10 километр масофаларда эркаклар ва аёллар ўртасида бир вақтнинг ўзида олтитадан совринли ўрин учун мукофотлар тақдим этилади. Бу ёндашув илк бор қўлланилмоқда ва нафақат профессионал спортчиларни, балки ҳаваскорларни ҳам қўллаб-қувватлашга қаратилган.
10 километр масофада ғолиб 6 миллион сўм, иккинчи ўрин соҳиблари 5 миллион, учинчи ўрин эгалари эса 4 миллион сўм мукофот олади. 5 километр масофада эса совринлар мос равишда 3,5 миллион, 3 миллион ва 2,5 миллион сўмни ташкил этади. Болалар югуришлари ғолиб ва совриндорларига ҳам ташкилотчилар ва ҳамкорлар томонидан совғалар топширилади.
Рўйхатдан ўтиш қуйидаги платформа орқали амалга оширилмоқда: perfend.com/en/events/sport/sr-tashkent
Silk Road Uzbekistan лойиҳаси мамлакатда оммавий тадбирлар форматига янги мазмун олиб кирмоқда. Югуриш нафақат жисмоний фаоллик, балки мулоқот, бирлашиш ва шаҳар муҳитига янгича нигоҳ билан қараш усулига айланмоқда.
15–16 май кунлари EXPO майдони сифатида Tashkent City Mall танланган. Бу ерда Silk Road Tashkent 2026 иштирокчилари старт пакетларини олиш ва мусобақага тайёргарлик кўриш имкониятига эга бўлади. EXPO анъанавий равишда катта спорт тадбирининг асосий марказларидан бири ҳисобланади. Старт пакетини олиш учун иштирокчилар паспорт ёки шахсни тасдиқловчи бошқа ҳужжат ҳамда рўйхатдан ўтиш вақтида олинган QR-кодни тақдим этиши лозим.