Тошкентда WUF13 доирасида маданиятнинг шаҳар ривожланишидаги ўрнига бағишланган семинар бўлиб ўтди

22-май куни Ўзбекистон Республикасидаги Озарбайжон Республикаси Элчихонаси ҳузуридаги Ҳайдар Алиев номидаги Озарбайжон Маданият маркази ташаббуси билан Тошкент архитектура-қурилиш университетида “Шаҳар ривожланишида маданиятнинг ўрни ва таъсири: WUF13 Бутунжаҳон шаҳар ривожланиши форуми доирасида Боку ва Тошкент моделлари қиёсий таҳлили” мавзусида семинар-дастур ташкил этилди.

Тадбир очилишида сўзга чиққан Тошкент архитектура-қурилиш университети ректори Баҳром Тулаганов семинар университет деворларида ўтказилаётганидан мамнун эканини билдирди. У WUF13 доирасида Боку ва Тошкент шаҳарларини маданият, меъморий мерос ва шаҳарсозлик тажрибаси нуқтаи назаридан қиёсий таҳлил қилиш долзарб ва муҳим эканини таъкидлади. Ректор мазкур мавзу талабалар, тадқиқотчилар ва мутахассислар учун илмий ҳамда амалий жиҳатдан фойдали эканини қайд этди. У Ҳайдар Алиев номидаги Озарбайжон Маданият маркази ташаббусини юксак баҳолаб, бундай тадбирлар Озарбайжон ва Ўзбекистон ўртасидаги илмий-академик ҳамкорликни ривожлантиришга, ёш мутахассисларнинг билим ва дунёқарашини кенгайтиришга хизмат қилишини таъкидлади.
Тадбир давомида Марказ директори Акиф Марифли айни кунларда Боку шаҳрида шаҳарсозлик соҳасидаги энг нуфузли халқаро форумлардан бири — WUF13 бўлиб ўтаётганини қайд этди. Форумнинг асосий мавзуси — “Дунёни уй-жой билан таъминлаш: хавфсиз ва барқарор шаҳарлар ҳамда ҳамжамиятлар”дир. У маданий меросни асраш ва миллий-маданий қадриятларни урбанизация жараёнларига интеграция қилиш шаҳарлар ривожида муҳим ўрин тутишини таъкидлади. А.Марифли, шунингдек, Президентлар Илҳом Алиев ва Шавкат Мирзиёев ўртасида шаклланган стратегик шериклик туфайли Озарбайжон ва Ўзбекистон ўртасидаги ҳамкорлик шаҳарсозлик, меъморчилик ва маданий меросни асраш соҳаларида муваффақиятли ривожланаётганини, бу эса туркий дунёнинг умумий урбанистик маконини шакллантиришга хизмат қилаётганини айтди.

Семинар доирасида Боку ва Тошкент моделлари қиёсий таҳлил қилинди. Боку мисолида тарихий мероснинг замонавий шаҳар муҳити билан уйғунлиги, маданий объектларнинг шаҳарнинг халқаро имижига таъсири ҳамда урбанизация жараёнида маданий маконларнинг ўрни кўриб чиқилди.

Тошкент модели эса 1966 йилдаги зилзиладан кейинги тикланиш жараёни, режалаштирилган шаҳарсозлик ёндашуви ва тарихий-маданий мероснинг замонавий меъморчилик билан интеграцияси нуқтаи назаридан тақдим этилди.

Таъкидланганидек, ҳар икки шаҳарнинг ривожланиш тажрибаси шаҳар трансформациясида маданиятнинг муҳим рол ўйнашини намоён этади. Маданий объектлар нафақат меъморий ёдгорликлар, балки ижтимоий мулоқот, жамоатчилик иштироки, туризм, креатив иқтисодиёт ва шаҳар идентификациясини мустаҳкамлаш учун муҳим маконлар ҳисобланади.

Шу маънода, Боку ва Тошкент моделлари тарихий меросни асраш ҳамда замонавий шаҳар ривожланиши ўртасидаги мувозанатни яратишнинг эътиборга молик намунаси сифатида баҳоланди.

Тадбирда архитектура ва шаҳарсозлик соҳаси мутахассислари, маданий ва илмий жамоатчилик вакиллари, шунингдек Тошкент архитектура-қурилиш университетининг профессор-ўқитувчилари ва талабалари иштирок этди.

Семинар WUF13 доирасида шаҳар ривожланишида маданий ёндашувнинг аҳамиятини таъкидлаган, шунингдек Озарбайжон ва Ўзбекистон ўртасидаги маданий-гуманитар ҳамда илмий-академик ҳамкорликни кенгайтиришга ҳисса қўшган муҳим тадбир сифатида ёдда қолди.