Ўзбекистон гимнастлари Тошкентда ўтаётган Жаҳон кубоги босқичи финалига йўл олди

Тошкент шаҳрида спорт гимнастикаси бўйича 19 давлат спортчилари иштирокида ўтаётган Challenge Жаҳон кубоги босқичида Ўзбекистоннинг етти нафар вакили финал йўлланмасини қўлга киритди.

Мусобақанинг биринчи кунида турнирнинг очилиш маросими ҳамда саралаш чиқишлари бўлиб ўтди. Саралаш босқичи якунларига кўра, аёллар ўртасида Оксана Чусовитина ва Шаҳрибону Юсупова таянч сакраш машқида, шунингдек Дилдора Арипова турли баландликдаги бруслар машқида финалга чиқди.

Эркаклар ўртасида эса Ҳумоюн Исломов эркин машқлар дастурида, Мансур Раҳматов от усти машқларида, шунингдек Аҳрорхон Темурхонов ва Озотилла Аҳрорхон ҳалқалар машқида медаллар учун курашиш ҳуқуқини қўлга киритди.

Спорт гимнастикаси бўйича Challenge Жаҳон кубоги босқичи Ўзбекистон пойтахтида ўтмоқда ва унда 19 давлат спортчилари иштирок этмоқда. Олдинда иштирокчиларни финал чиқишлари кутмоқда, унда ўзбек гимнастлари совринли ўринлар ва турнир медаллари учун баҳс олиб боради.