Қозоғистонлик теннисчи жаҳон рейтингида пешқадамга айланди

Қозоғистонлик теннисчи Елена Рибакина АҚШ очиқ чемпионати яримфиналига йўл олиб, фаолиятида илк бор WTA рейтингининг биринчи поғонасига кўтарилади. Бу ҳақда Халқаро аёл теннисчилар ассоциацияси (WTA) матбуот хизмати хабар берди.

Манбага кўра, Рибакина 99 ҳафта давомида рейтингда пешқадамлик қилган Арина Сабаленканинг ўрнини эгаллайди. Сабаленка бу даврда 2025 йилги Australian Open ва АҚШ Очиқ чемпионатида ғолиб чиқиб, икки йил кетма-кет мавсумни рейтинг етакчиси сифатида якунлаганди.

Еленанинг Нью Йоркдаги турнирда иштирок этиши ҳам сўроқ остида эди. У мусобақа олдидан чап оёқ тўпиғидан жароҳат олганди. Шунга қарамай, қозоғистонлик теннисчи дастлабки тўртта учрашувда бирорта сетни бой бермасдан, чорак финалга чиқди. Кейин хитойлик Чжен Синвенни 3:6, 6:1, 6:4 ҳисобида мағлуб этиб, фаолиятида илк бор US Open яримфиналига йўл олди.

Шу тариқа Рибакина WTA тарихида рейтингнинг биринчи поғонасига кўтарилган 30-аёл теннисчи бўлади. Шунингдек, у Қозоғистон тарихида аёллар ўртасидаги жаҳон рейтингида биринчи ўринни эгаллаган илк теннисчига айланади.

Фото: WTA
27 ёшли Рибакина WTA рейтинги тарихида биринчи поғонага чиққан иккинчи энг катта ёшли теннисчи бўлади. 2016 йилда 28 ёшли германиялик теннисчи Анжелик Кербер фаолиятида илк бор рейтинг пешқадамига айланган.

Айни пайтда Рибакина АҚШ Очиқ чемпионатидаги иштирокини давом эттирмоқда. У турнир якунланганидан сўнг расман WTA рейтингида биринчи ўринга кўтарилади.

Маълумот учун, Елена Рибакина 27 ёшда. Қозоғистонлик теннисчи Аёллар теннис ассоциацияси (WTA) турнирларининг яккалик баҳсларида жами 8 та титулни қўлга киритган. Рибакина 2 марта “Катта дубулға” турнирида — “Уимблдон” (2022) ҳамда Австралия очиқ чемпинати (2026) бош совринига эга чиққан. У яккалик баҳсларида 2020 йилги Токио Олимпиадасида 4-ўринни эгаллаган.

Бундан ташқари, Рибакина сўнгги 52 ҳафта давомида топ — 10 вакилларини 16 марта мағлуб этди. У мазкур даврда 1569 та тўғридан-тўғри очко келтирган зарба ва 394 та эйс қайд этиб, ҳар икки кўрсаткич бўйича WTA турида энг яхши натижани кўрсатди.

АҚШ очиқ чемпионати мавсумдаги тўртинчи “Катта дубулға” турниридир. Мусобақа қаттиқ қопламали кортларда ўтказилмоқда ва 13 сентябрь куни якунланади. Турнирнинг умумий мукофот жамғармаси 108 миллион долларни ташкил этади.

Аёллар ўртасидаги яккалик баҳсларининг амалдаги ғолиби беларуслик Арина Сабаленка ҳисобланади.

Манба: daryo.uz