Ўзбекистонда метан газ нархи яна икки ой ўзгармайди

Энергетика вазирлигига кўра, метан газнинг энг баланд чакана нархи 1 июнгача 3 350 сўм қилиб белгиланмоқда.

Вазирлар Маҳкамасининг қарори билан метан газ учун белгиланган энг баланд чакана нархнинг амал қилиш муддати узайтириляпти. Бу ҳақда Энергетика вазирлиги Матбуот хизмати хабар қилди.

Қайд этилишича, эндиликда автомобилларга газ тўлдириш компрессор шохобчаларида табиий газни сотишда унинг энг баланд чакана нархи 2024 йил 1 июнгача бир куб метр учун 3 350 сўм қилиб белгиланмоқда.

Яъни, 1 апрелдан эътиборан якунига етиши керак бўлган энг баланд чакана нарх учун белгиланган муддат яна икки ой давомида жузъий ўзгартишлар билан амал қилади (аввалги нарх 3 250 сўм эди).

Аввалроқ, ижтимоий тармоқларда Тошкентдаги айрим газ тўлдириш шохобчаларида 1 апрелдан метан газ нархи ошиши ҳақида хабарлар тарқалганди. Унга кўра 1 метр куб газ нархи 3800 сўм бўлиши айтилган.