Олимпиада мусобақаси ўтказилиши керак бўлган дарё тимсоҳлар сабабли яроқсиз деб топилди

Халқаро эшкак эшиш федерацияси (World Rowing) Австралиянинг Квинсленд штатидаги тимсоҳлар макон қилган Фицрой дарёсини 2032 йилги Олимпия ўйинлари давомида мусобақалар ўтказишга яроқсиз деб эълон қилди.

Фицрой дарёси Олимпия ва Паралимпия ўйинларида эшкак эшиш мусобақаларини ўтказиш учун штат ҳукумати томонидан тавсия этилганди.

Фицрой дарёси машғулотлар учун мос бўлса-да, у миллий ёки халқаро даражадаги мусобақаларни ўтказиш имкониятини тасдиқловчи ҳеч қандай техник асослашдан ўтмаган. Тарқалган хабарларга зид равишда, бу ерда катталар ўртасида миллий чемпионатлар ёки Австралия академик эшкак эшиш чемпионатлари ўтказилмаган, дейилади World Rowing баёнотида.

Таъкидлаш жоизки, 2032 йилги ёзги Олимпия ўйинлари Брисбен шаҳри ва унинг атрофидаги Жануби-Шарқий Квинсленд минтақасида бўлиб ўтади. Брисбен Олимпия ўйинларини қабул қиладиган Австралиянинг учинчи шаҳри бўлади. Илгари бундай нуфузли мусобақа Мелбурн (1956) ва Сиднейда (2000) шаҳарларида ўтказилган эди.

Манба: daryo.uz