Тошкентда бокс бўйича Баҳодир Жалолов ва гимнастика бўйича Оксана Чусовитина маҳорат мактаблари ташкил этилади

Президент Шавкат Мирзиёевнинг 2021 йил 5 ноябрдаги «Спорт-таълим муассасалари фаолиятини 2025 йилгача ривожлантириш дастури тўғрисида»ги қарори ҳамда Олимпия ўйинларида ғолиб ва совриндор бўлган ўзбекистонлик спортчилар фаолиятини кенг тарғиб этиш мақсадида гимнастика бўйича Оксана Чусовитина ва бокс бўйича Баҳодир Жалолов спорт маҳорат мактабтларини ташкил этиш бўйича президент қарори эълон қилинди. Бу ҳақда Спортни ривожлантириш вазирлиги маълум қилди.

Қарорга кўра, ҳар икки мактаб 2022/2023 ўқув йилидан ўз фаолиятини бошлайди. Гимнастика мактабида 1—11-синф ўқувчиларидан иборат 165 нафар, бокс мактабида эса 5—11-синф вакилларидан 175 нафар ўқувчи таҳсил олади. Маҳорат мактаби ўқувчиларини умумтаълим дастурлари бўйича ўқитиш уларга энг яқин жойлашган умумий ўрта таълим мактабларида амалга оширилади.

Мактабларни ташкил этиш учун давлат бюджетидан 50 миллиард сўм (ҳар иккиси учун 25 миллиард сўмдан) ажратилади.

Гимнастика мактаби Тошкент шаҳар, Миробод туманида жойлашган 175-сон умумий ўрта таълим мактабига туташ ҳудудда барпо этилади. Бокс мактаби эса Тошкент шаҳар, Юнусобод тумани, 9-мавзеда жойлашган 259-сон умумий ўрта таълим мактаби ҳудудида ташкил этилади.

Манба: daryo.uz