Миллий кутубхонаси олди майдони ва Тарас Шевченко кўчасида автотранспорт воситалари ҳаракати вақтинча чекланади — Харита

Янги йил байрам тадбирига тайёргарлик кўриш ва уларни юқори савияда ўтказиш, шунингдек байрам кунлари аҳоли хавфсизлигини таъминлаш ҳамда жамоат тартибини сақлаш мақсадида пойтахтнинг айрим ҳудудларида автотранспорт воситалари ҳаракати вақтинча чекланади деб Тошкент шахар хокимияти хабар берди.

Маълум қилинишича, 2025-йил 15-декабрдан 2026-йил 15-январгача Ўзбекистон Миллий кутубхонаси олди майдонида қуйидаги кўчаларнинг айрим қисмларида ҳаракат чекланади:

— Зарафшон кўчасининг “Hyatt Regency Tashkent” меҳмонхонаси қўриқлаш пунктидан Матбуотчилар кўчасигача бўлган қисми;
— Истиқлол кўчасининг Амир Темур шоҳ ва Буюк Турон кўчалари оралиғидаги қисми;
— Буюк Турон кўчасининг Истиқлол кўчаси кесишмасидан Ёшлар ижод саройигача бўлган қисми.

Шунингдек, 2025-йил 17-декабрдан 2026-йил 5-январгача Тарас Шевченко гастрономик-туризм кўчасида ҳам автотранспорт ҳаракати чекланади. Хусусан:

— Тарас Шевченко кўчасининг Фидокор кўчаси кесишмасидан Нукус кўчаси кесишмасигача;
— Саййид Барака кўчасининг Ойбек кўчаси кесишмасидан Амир Темур шоҳ кўчасигача бўлган қисми.

Қайд этилишича, ҳаракат чекловлари байрам тадбирларининг хавфсиз ва тартибли ўтишига қаратилган. Шу муносабат билан ҳайдовчиларга ўз ҳаракат йўналишларини олдиндан режалаштириш ва белгиланган вақтинчалик ўзгаришларни инобатга олиш тавсия этилмоқда.