Енгил атлетика. Анвар Анваров Венгриядаги турнирда бронза медалини қўлга киритди

Венгриянинг Будапешт шаҳрида енгил атлетика бўйича Gyulai István Memorial — Hungarian Athletics Grand Prix турнири бўлиб ўтди. Бутунжаҳон енгил атлетика федерациясининг тақвимидан ўрин олган олтин даражадаги мазкур мусобақада қатнашган ҳамюртимиз Анвар Анваров шоҳсупага кўтарилди.

Атлетимиз Олимпиада ва жаҳон чемпионлари жамланган узунликка сакраш секторида бронза медалига сазовор бўлди. Унинг сўнгги уринишда кўрсатган 8.05 метр натижаси шоҳсупанинг учинчи поғонасига кўтарилишини таъминлади.

Ушбу натижа юртдошимизга келаси ой Токиода бўлиб ўтадиган жаҳон чемпионати йўлланмаси учун қимматли рейтинг очколарини тақдим қилди.

Манба: olympic.uz