Ўзбекистон дзюдо федерацияси раиси Болгарияда спортчиларимиз билан мулоқот қилди
София шаҳри мезбонлигида ўтаётган дзюдо бўйича кадетлар ўртасидаги жаҳон чемпионатининг иккинчи кунги беллашувлари ортда қолди.
Ўзбекистон терма жамоаси икки кунлик баҳслар якунига кўра 3 та олтин, 1 та бронза медали билан 70 дан ортиқ давлат орасида умумжамоа ҳисобида 1-ўринни эгаллаб турибди.
Ўзбекистон дзюдо федерацияси раиси Азизжон Камилов дзюдочиларимизни муваффақиятли старт билан қутлаш мақсадида Болгария пойтахтига етиб борди. Унга сафар давомида раис ўринбосари Зафар Қаҳрамонов ҳамроҳлик қилмоқда.
Федерациямиз мутасаддилари терма жамоа мураббийлар штаби ва дзюдочилар билан учрашиб, дилдан мулоқот қилишди. Азизжон Камилов қўлга киритилган медаллар жамоавий меҳнат маҳсули эканини айтиб, қолган икки кунлик беллашувлар, шунингдек, аралаш жамоавий баҳсларда ҳам ана шу юқори темпни сақлаб қолиш лозимлигини таъкидлади.