FIDE рейтинги янгиланди. Нодирбек Абдусатторов яна пастлади, Жавоҳир Синдоров ўз ўрнини сақлаб қолди
Рейтингда Магнус Карлсен (Норвегия) 2839 очко билан биринчи ўринда қолмоқда. Унинг рейтинг очколари ўзгармаган бўлса-да, етакчиликни сақлаб қолди. Иккинчи ўринни америкалик Ҳикару Накамура (2816), кучли учликни эса яна бир АҚШ вакили Фабиано Каруана (2789) якунлаган.
Ўзбекистоннинг биринчи рақамли шахматчиси Нодирбек Абдусатторов 2750 очко билан 12-ўринни эгаллади. Бу аввалги ойга нисбатан 1 поғона паст. Эътиборлиси, у август ойида 2748 очко билан 11-ўринда эди. Гарчи очколари 2 баллга ошган бўлса-да, нидерландиялик Аниш Гири рейтингда кескин кўтарилиб, Абдусатторовни бир поғона пастлашига сабабчи бўлди.
Жавоҳир Синдоров эса рейтингда Ўзбекистоннинг иккинчи рақамли гроссмейстери бўлиб қолмоқда. У 2721 очко билан 24-ўринни сақлаб қолган. Унинг рейтингдаги ўрни ўтган ой билан бир хил бўлса-да, Синдоровнинг ҳисобидаги баллар миқдори 1 очкога камайган (августда 2722 эди).
Нодирбек Якуббоев рейтингда 5 поғона юқорилади. Августда у 2681 очко билан 45-ўринда эди, ҳозир эса 2689 очко билан 40-поғонага кўтарилиб олди. Тажрибали гроссмейстер Рустам Қосимжонов 2671 очко билан 47-ўринга тушган. У ўтган ойда 46-ўринда эди. Яна бир ўзбекистонлик шахматчи Шамсиддин Воҳидов рейтингда 3 поғона пастлади. Ҳозирда у 2640 очко билан 86-ўринни банд этмоқда (августда 83-ўрин).
FIDE жамоавий рейтингига кўра, Ўзбекистон Шахмат федерацияси 2601 очко билан 13-ўринни эгаллаб турибди.
Манба: daryo.uz