“Текинга жанг қилишга ҳам тайёрман” — Бектемир Мелиқўзиев

Айни пайтда WBA рейтингида ўз вазн тоифасида биринчи ўринни эгаллаб турган ўзбекистонлик боксчи Бектемир Мелиқўзиев чемпионлик жангини текинга ўтказишга ҳам тайёр эканини маълум қилди. У жаҳон чемпиони Хайме Мунгуяга қарши чемпионлик жангини ўтказиш учун мажбурий даъвогар ҳисобланади.

“Жанг учун тўланадиган пул муҳим эмас, мен текинга жанг қилишга ҳам тайёрман. Лекин илтимос, менга ва ўйин қоидаларига нисбатан ҳурмацизлик қилишни тўхтат!

Хайме Мунгуя, мен сен чемпионлик учун жанг қилишингдан олдин ҳам мажбурий даъвогар эдим. Сен чемпион бўлдинг — мен чемпион бўлганимда сенга ёки бошқа ҳар қандай боксчига нисбатан қандай ҳурмат кўрсацам, сен ҳам менга шундай ҳурмат кўрсат!

WBA’га ҳурмат кўрсат, мухлисларни ҳурмат қил. Улар олдиндан натижаси маълум бўлган жангни эмас, балки ҳақиқий жангни кўришни исташади!”, деб ёзди ўзбекистонлик боксчи ўзининг Instagram саҳифасида.

Мунгуя 2 май куни Лас Вегасдаги “Т-Mobile Arena”да Хосе Армандо Ресендисни очколар ҳисобида мағлуб этиб, WBA чемпионлик камарини қўлга киритганди. Унинг мажбурий ҳимоя учун белгиланган 120 кунлик муддати 30 августда якунланган.

WBA қоидаларига кўра, чемпион мажбурий ҳимоя муддати тугашидан олдинги 60 кун ичида расмий мажбурий даъвогардан бошқа боксчига қарши жанг ўтказа олмайди.

Агар Мунгуя ва Мелиқўзиев жамоалари 21 октябргача келишувга эриша олмаса ёки томонлардан бири музокараларни давом эттиришдан бош тортса, WBA жанг ҳуқуқини аниқлаш учун аукцион ўтказиши мумкин.

Манба: daryo.uz