Истанбул-2022. Навбаҳор Ҳамидова иккинчи жангда ҳам ғалаба қозонди

Туркияда бўлиб ўтаётган бокс бўйича аёллар ўртасидаги жаҳон чемпионатида бугунги дастур доирасида ўзбекистонлик бешинчи спортчи ўз жангини ўтказди. 66 кг. вазн тоифасидаги ҳамюртимиз Анна Хамори (Венгрия) билан жанг олиб борди.

Ўзбекистонлик боксчи биринчи раундни, ҳакамларнинг овозига кўра, 4:1 ҳисобида ўз фойдасига ҳал қилди. Иккинчи бўлим эса 3:2 ҳисобида венгриялик спортчи фойдасига ҳал бўлди.

Навбаҳор сўнгги бўлимда фаолликни оширди ва жангда ғалаба қозонди. Ҳакамларнинг якуний баҳоси — 4:1.

Шу тариқа, Ҳамидова чорак финал йўлланмасини қўлга киритди. У ярим финал йўлланмаси учун туркиялик Бусеназ Сурменилига қарши рингга кўтарилади.

Умуман олганда эса, ЖЧга йўл олган 10 нафар ўзбекистонлик боксчилардан беш нафари чорак финалга чиқишди.

Манба: stadion.uz