Тошкент шаҳрининг дизайн-коди расман тасдиқланди

Халқ депутатлари Тошкент шаҳар Кенгаши пойтахт учун янги шаҳар дизайн-кодини тасдиқлади. Қарор Toshkent Invest компания буюртмаси асосида SM International компанияси томонидан ишлаб чиқилган ҳужжатга таяниб қабул қилинди. Шунингдек, ҳужжат тайёрлаш жараёнида пойтахт ҳокимиятининг таклифлари ҳам инобатга олинган.

Янги дизайн-код шаҳар ҳудудларини режалаштириш, жамоат жойларидаги дизайн элементларини жойлаштириш, тижорат объектларининг ташқи кўринишини безаш ҳамда Тошкентнинг ягона визуал қиёфасини шакллантиришга қаратилган қоидаларни белгилайди.

Ҳужжатда, шунингдек, дизайн элементлари каталоглари, туристик ва гастрономик кўчалар рўйхати ҳамда ободонлаштириш ва санитария тозалигини таъминлаш учун эксплуатация йиғими миқдори ҳам киритилган.

Қарорга мувофиқ, пойтахт туман ҳокимликлари икки ой муддат ичида бош архитекторлар назорати остида жамоат жойлари чегараларининг схемаларини ишлаб чиқиши лозим.Батафсил маълумотлар яқин кунларда эълон қилиниши кутилмоқда.