Ўзбекистонда бошқарув компанияларига ҳисобот тақдим этмагани учун тўловлар ҳисобланиши тўхтатилади
Ўзбекистонда бошқарув компаниялари ҳар чоракда ҳар бир кўп қаватли уй бўйича даромад ва харажатлар ҳақида ҳисобот бериши шарт. Агар ташкилот ҳисоботни электрон биллинг тизимига жойлаштирмаса, қоидабузарлик бартараф этилгунга қадар мажбурий бадалларни ҳисоблаш тўхтатилади.
Бу ҳақда Олий Мажлис Қонунчилик палатаси мажлисида қурилиш ва уй-жой коммунал хўжалиги вазири ўринбосари Шерзод Ҳидоятов маълум қилди.
Қоидаларни такроран бузганлик учун қўшимча чоралар ҳам белгиланган. Агар бошқарув компанияси бир йил давомида уйларни бошқариш қоидаларини уч марта бузса, Уй-жой инспекцияси уни электрон реестрдан чиқариши мумкин.
Қурилиш вазирлиги маълумотларига кўра, жорий йилда ўз мажбуриятларини лозим даражада бажармагани учун 45 та ташкилот реестрдан чиқарилган.