Тошкент шаҳрида Google Street View кўча панорамалари янгиланмоқда
Тошкент шаҳар ҳокимлигининг маълум қилишича, пойтахтда Google Maps сервисидаги Google Street View панорама суратларини янгилаш ишлари бошланди. Янгиланган 360 даражали тасвирлар дунёнинг турли нуқталаридан туриб шаҳарни виртуал саёҳат қилиш ва сафарларни олдиндан режалаштириш имконини беради.
Google Хариталардаги мавжуд панорамаларнинг аксарияти бундан қарийб беш йил муқаддам олинган бўлиб, пойтахтнинг замонавий қиёфаси ва инфратузилмасини тўлиқ акс эттирмас эди. Махсус 360 даражали камералар ёрдамида олиб борилаётган суратга олиш ишлари, энг аввало, марказий кўчалар, истироҳат боғлари ва диққатга сазовор жойларни қамраб олади. Кейинчалик эса босқичма-босқич бутун шаҳар бўйлаб панорама тасвирлари янгиланади.